Општина Бутел денеска одобри финансиска помош во износ од 1.000.000 денари за семејствата на жртвите од трагедијата во Кочани. Одлуката беше донесена на вонредна седница на Советот на Општината, која започна со едноминутно молчење во чест на 59-те животи згаснати во трагичниот пожар на 16 март.
Градоначалникот Дарко Костовски изрази голема тага за настанот и ја истакна потребата од солидарност и поддршка во овие тешки моменти.
„Македонија е завиена во црно и секој од нас чувствува длабока тага и болка за трагично згаснатите животи. Моите молитви се со семејствата на починатите и со повредените, со надеж за нивно што побрзо закрепнување. Немам зборови со кои можам да ја опишам оваа голема трагедија, но во овие моменти ни се потребни солидарност, единство и одговорност. Кочани, 16.03.2025 – Никогаш повеќе да не се повтори!“ – напиша Костовски.
Овој гест на Општина Бутел е знак на поддршка за семејствата погодени од трагедијата и повик за поголема помош од институциите и граѓаните.
