Заменик командирот на противпожарната единица на Град Скопје, Владимир Симоновски во Аргумент плус рече дека несоодветните материјали од кои бил изграден кровот на дискотеката „Пулс“ во Кочани и тешкиот пристап на објектот придонеле да имаме ваква трагедија. Тој објасни и дека за такви настани со голем број на посетители потребно е да се извести и полицијата и противпожарната единица.
„Кровот има дрвена конструкција и како што имам информации дека бил реновиран лани и додадени биле парчиња сунѓери и платно. Тоа се лесно запаливи материи и бргу се шират и предизвикуваат голем чад. Тоа не се стандардни услови за работа на дискотека по закон. Употребата на пиротехниката треба да е минимум 3 метри до кровот. Висината на кровот не била соодветна. Пожарот бргу се ширел за 3 до 5 мин бил зафатен цел кров“, рече Симоновски.
Според него, организаторот на настанот требало да ги извести и МВР и противпожарните единици дека ќе има настан со повеќе гости.
„Пристапот на самиот терен каде што се наоѓа објектот бил тежок бидејќи таму имало 500 луѓе внатре и голем број на автомобили надвор. Кога дошле до самото место можете да замислите дека имало само еден влез од кој луѓето излегувале и требало да влезат пожарникарите. На вакви настани треба да бидат известени и полицијата и пожарната дека ќе има настан со повеќе луѓе. Ние во Град Скопје сме практикувале за поголеми настани, дали за натпревари, дали концери дали настани од амбасади, секогаш има барање. Овде каде што знаете според органзаицијата дека ќе има употреба на пиротехника, знаете дека можноста да има пожар е поголема. Сопственикот или компанијата требала да си поденсе елаборат за еваукација и да изготви проценка за ризик од пожари и несакни ситуации“, додаде Симоновски.
Извор: 24vesti.mk
