Балетската уметност бара многу откажувања, многу солзи, буткања за да стигнеш до таму каде што ти е зацртано, вели балерината и кореографка Саша Евтимова во подкастот „За секого по нешто“ на САКАМДАКАЖАМ.МК. Евтимова, истакнатa балетскa солистка во Националната опера и балет (НОБ), годинава слави 25 години успешна уметничка дејност, но вели, реално се 35 години на сцената, бидејќи првата претстава ја имала на 10-годишна возраст, во „Зодијак“.
Подкастот можете да го гледате тука:
За тоа како поминаа 25 години, Евтимова вели: „Со многу солзи, многу работа, многу откажувања, буткања за да стигнеш до таму каде што ти е зацртано. Навистина се буткав, иако сум денес зрела балерина, на еден начин на залез на кариера, но едноставно бев решена самата со себе дека морам да го направам тој јубилеј 25 години. Еден вид затворање на една врата, но и отворање на нови предизвици за мене како уметник“.
Талентот за балет кај неа го препознал нејзиниот тетин, театарскиот критичар Иван Ивановски, бидејќи Евтимова секој роденден одржувала дома претстави, настапувала во специјално шиени фустани. Во балетско училиште се запишала на 7 години.
„Мојата професорка Елисавета Кушовска виде потенцијал и секогаш ми зборуваше ти никогаш нема да бидеш балерина, ќе бидеш добар кореограф. Можеби тоа ‘Ти никогаш нема да бидеш балерина’, повеќе звучеше во мојата глава отколку тоа кореграф оти сакав да ѝ докажам на мојата професорка дека ќе бидам не само добра, туку одлична балерина на сцена и мислам дека сум веќе единствена од нејзината класа, покрај Мими Поп Алексова-Атанасовска која сѐ уште танцува. И покрај сите повреди, секогаш се враќам во форма и подобро од првиот пат. За кореографија, првата шанса ми ја даде професорката Кушовска на 9 или на 10 години, во првата сезона на ‘Дајте музика’. Тука имав прво кореографско искуство, да правам кореографии на познати песни во тоа време. Работев и на втората сезона“, вели Евтимова.
Додава дека нејзиниот брат, театарскиот режисер Синиша Евтимов, чии претстави се едни од најпосетуваните во македонските театри, не доаѓа на нејзините претстави, оти ѝ велел: „Ми е тешко да те гледам на сцена зашто знам што сѐ имаш поминато во својот живот за да достигнеш до таму кај што си денеска“.
Балерината во подкастот зборува и за работата во Талин, за односот со педагозите, за тоа дека ѝ е предизвик да прави претстава за деца, дека ќе прави и целосна обнова на балетот „Оревокршачка“, како и за новата претстава во Балетот, „Патување“ во кореографија на Џан Арслан.
Б. НЕСТОРОСКА
ИЗВОР: sdk.mk
