После четири години од исклучувањето од етерот, култното музичко радио Канал 103, кое постои 34 години, а продолжи да работи на Интернет, емитува емисија на програмата на Македонско радио – Радио 2. „Домашна работа“, радиомагазин за современа музика и култура во продукција на Стотројка, започна да се емитува во етерот на 2 март, во 20 часот. Со времетраење од два часа, оваа радиопрограма ќе се емитува секоја недела на фреквенциите на Македонско радио – Радио 2, а истовремено и на стриминг каналите на Стотројка.
Во март 2019, најстариот и најрелевантен алтернативен медиум во земјава беше исклучен од етерот, продолжувајќи со емитување на програмата исклучиво онлајн. Агенцијата за електронски комуникации му ја зеде фреквенцијата поради неговиот нерегулиран статус – радиото три децении е неформално дел од Македонската радио-телевизија (МРТ). На 1 мај 2021, го исклучија радио-стримингот и 24 часа имаше молк. Потегот за 30-годишнината од основањето, беше знак на протест поради тоа што веќе 2 години нема фреквенција и покрај јавните ветувања на МРТВ и на Владата.
Емисијата „Домашна работа“ е прва официјална соработка, по повеќе децении, помеѓу Македонската радиотелевизија (МРТ) и Канал 103, еден од најстарите независни и алтернативни медиуми во земјата и радио на заедницата, основано 1991 во рамките на Македонското радио/Радио Скопје.
„Ова треба да биде само прв исчекор, само почеток на една континуирана соработка меѓу националниот јавен дифузер и Канал 103, која во иднина ќе се развива и продлабочува на взаемно задоволство и конечно, во интерес на граѓаните и јавното добро. Сето тоа со една конечна цел – враќање на фреквенцијата и дефинитивно легализирање на Канал 103, кој веќе 34 години е бастион на независната мисла и радио дом на културата“, велат од Стотројка.
„Домашна работа“ е радиомагазин што ја истражува и промовира македонската алтернативна и независна музичка и културна сцена. Наменета за пошироката публика со интерес за музика, култура и уметност, целта на емисијата е да им даде глас на локалните музичари, уметници и културни активисти, истовремено поттикнувајќи критичко промислување на тековните предизвици во културниот сектор.
„Една од главните цели на ‘Домашна работа’ е промовирање и развивање на сцената надвор од главниот град и придонесување кон суштинска културна децентрализација. Така, во второто издание на овој радио магазин, Стотројка го посети градот херој, по повод Прилепскиот карневал и еднодневниот фестивал ‘Прочка ебаго’ – добар пример за успешна соработка меѓу независната сцена и локалните јавни институции“, велат од Канал 103.
Во третото издание на „Домашна работа“ што ќе се емитува утре (16 март), меѓу другите содржини, ќе има интервју со македонскиот музичар и композитор Никола Коџабашија, кој веќе долги години живее и работи во Велика Британија.
Б. НЕСТОРОСКА
ИЗВОР: sdk.mk
