Обвинителката во Јавното обвинителство Скопје, Спасенка Андоновска во 24 анализа рече дека кога жртвата ќе се одлучи да пријави насилство потребно е да и се даде сигурност и заштита.
Според неа, ваквите чекори се важни за жртвата да не ја повлече пријавата.
„Институциите треба да одговорат со сите капацитети и свесни сме дека не сите случаи завршиле со фемицид но свесни сме дека фемицидот е последица од насилство. Повлекувањето од постапката е последица од многу аномалии детектирани, нема кој да застане зад неа и повлекувањето автоматски значи завршување на таа постапка. Треба да се работи на измени на законите. Битно е од почеток на пријавата и Центарот за социјална работа и невладините да се вклучат со обезбедување на соодветни мерки кои ќе и дадат сигурност, кога ќе се почувствува сигурна ќе биде истрајна“, рече Андоновска.
Таа зборуваше и за тоа дека истрагата за фемицид треба да оди наназад со цел да се откријат мотивите на сторителот.
„Истрагата треба да е внимателна и да оди наназад до изворот на проблемот кој се манифестирал со убиство на жена. Родово базираното насилство е дефинирано во законот но битно е да се сфати концептот и суштината и тоа е предизвик за јавниот обвинител и не секое убиство значи фемицид. За да ја истражите постапката треба да се обезбедат докази кои ќе помогнат за дефинирање на основните причини и мотивација што довела сторилтеот да го направи тоа. Треба да се истражат сите податоци и релевантни информаци што ќе ни ја дадат реалната слика. Пријави, постапки кои често завршуваат со повлекување, правосилни пресуди. Битно е да се истражува однесувањето на жртвата до моментот на случување на дејството и какво било однесувањето на сторителот. Изјави на блиски лица, пријатели, колеги, соседи тоа се се доакзи кои ќе помогнат во истрагата“, додаде Андоновска.
Извор: 24vesti.mk
