„ЕУ е подготвена за можни дополнителни царини од САД“

БРИСЕЛ/ИСТАНБУЛ (АА) – Европската Унија (ЕУ) е подготвена во случај Соединетите Американски Држави (САД) да одговорат на контрамерките од ЕУ за царините на Вашингтон за челик и алуминиум, изјави денес портпаролот на Европската комисија, Олоф Гил, јавува Анадолу.

„Подготвени сме за што и да се случи. Подготвени сме повеќе од една година“, рече Гил на прес-конференција во Брисел.

Гил изрази жалење за царините од 25 отсто што САД ги воведоа на увозот на челик и алуминиум вчера.

„Ги повикуваме САД веднаш да ги укинат царините и да започнат преговори за да се избегнат нови царини во иднина“, додаде тој.

Истакнувајќи дека сакаат да преговараат со САД за царините, Гил повтори дека се подготвени за можните последици од одлуката на САД.

Царините од 25 отсто за увоз на челик и алуминиум стапија на сила вчера.

ЕУ најави дека ќе воведе контрацарини за американски стоки во вредност од 28 милијарди долари од следниот месец.

ЕУ објави и листа на американски производи кои би можеле да бидат подложени на контрацарините.

Листата од 99 страници вклучува месо, пилешки производи, мисиркино месо, млеко и павлака, јаткасти плодови, кафе, овошје и зеленчук, алкохолни пијалаци, гуми за џвакање, електронски цигари, виски, облека, рачен алат, машини и мотоцикли.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.