Со свечена заклетва во грчкиот Парламент, во присуство на премиерот на Грција Кирјакос Мицотакис, поглаварот на ГПЦ Јеронимос, пратениците, но и претставници на дипломатскиот кор, новиот грчки претседател Константинос Тасулас претпладнево положи свечена заклетва, по што и официјално, во Претседателската палата ја преземе функцијата и стана деветтиот претседател на Грција по обновувањето на демократијата во земјата во 1974 година.
Во Парламентот, Тасулас пред светото Евангелие ја повтори заклетвата, што ја читаше поглаварот на Грчката православна црква архиепископот Јеронимос, додека пак од церемонијата отсутни беа пратеничките групи на Курс на слобода и Грчко решение.
Во продолжение положи цвеќе на споменикот на Незнајниот војник пред објактот на Парламентот и се упати кон Претседателската палата каде што го пречека неговата претходничка Катерина Сакеларопулу.
Новиот грчки претседател, 66-годишниот Тасулас, роден е во градот Јанина, студирал во Атина, работел и во адвокатска канцеларија во Лондон, во периодот 1981-1990 година беше секретар на поранешниот претседател на Нова демократија Евангелос Авероф-Тосица, како и советник во неколку министерства, во Владата на Костас Караманлис беше заменик-министер за одбрана, а во Владата на Самарас министер за култура, но и градоначалник на населбата Кифисја во северниот дел на Атина.
Од 2000 година е пратеник од Нова демократија, а од јули 2019 година до јануари годинава беше претседател на Парламентот, позиција на која три пати со широко мнозинство беше изгласан од пратениците.
Во однос на ставовите кон нашата земја, генерално, позициите на новиот шеф на државата не се разликуваат од оние на актуелната грчка Влада.
Претседателот на Грција го избира Парламентот и има петгодишен мандат.
Извор: 24vesti.mk
