Градоначалникот на Тирана, Ерион Велиај, останува во затворски притвор, откако Апелацискиот суд против организиран криминал и корупција го отфрли барањето за изрекување поблага мерка.
– Одлуката судот ја донесе претпладнево по дводневните повеќечасовни рочишта, на кои адвокатите на Велиај образложија дека не постои опасност од бегство и нема можност за оштетување на доказите, нудејќи и финансиска гаранција.
Но, обвинителите потсетија дека Велиај е под истрага за корупција во девет случаи и перење пари и ги отфрлија обвиненијата на адвокатите за неговото апсење, објавија албанските медиуми.
Во судот беше и американскиот адвокат Џошуа Робертс, кој побара да го набљудува рочиштето, што беше одбиено како неосновано.
Робертс е дел од адвокатското студио Kasowitz Benson e Torres LLP, кого, според дел од медиумите, братот на Велиај го ангажирал за 300 илјади долари.
Велиај е во притвор од 10 февруари, откако беше уапсен под обвинение за корупција и перење пари. Според СПАК, истрагата открила дека Ерион Велиај, во својство на градоначалник на Тирана, формирал криминална шема во соработка со неговата сопруга Ајола Џоџа, бизнисмени и непрофитни организации поврзани со него за да имаат корист од големи суми пари.
По налог на Специјалното обвинителство против корупција и организиран криминал (СПАК), беше уапсен на 10. минатиот месец, а два дена подоцна му беше одредена мерка притвор, која ја издржува во затворот во Драч.
Велиај (46), на чело на албанскиот главен град беше трет мандат, а претходно и министер за социјална заштита.
Извор: kurir.mk
