Собраниската Комисија за финансирање и буџет на денешната седница одлучи Предлог-законот за изменување на Законот за спречување перење пари и финансирање тероризам да го проследи на натамошна постапка.
Со измените чии предлагачи се пратениците Садик Сулејмани, Халил Снопче, Калтрина Беќири, Аднан Азизи, Салим Сулејмани, Ријад Шаќири, Имрлије Салиу Фетаи и Саранда Имери Стафаи, се утврдени условите за избор/именување директор на Управата за финансиско разузнавање, односно се бара кандидатот за оваа позиција да има потврда или сертификат за положен испит за познавање еден од четирите најчесто користени јазици во Европската Унија (англиски, француски, германски и италијански) на ниво Б2 од Европската референтна рамка за јазици, издадени од установа или институција во државата или од странство, регистрирана како давател на оваа услуга, не постари од пет години.
Законот треба да се донесе по скратена постапка, а го образложи Сулејмани.
Според постојниот Закон, Управата за финансиско разузнавање е самостојна и оперативно независна при извршувањето на надлежностите и има овластување целосно слободно да ги извршува своите надлежности, вклучувајќи и одлучување во однос на анализирање, барање, проследување и доставување на резултатите од своите анализи и информации, податоци и документација до надлежните органи и единици за финансиско разузнавање на друга држава. Со неа раководи директор кој го именува и разрешува Владата на предлог на министерот за финансии по спроведен јавен оглас.
Извор: 24vesti.mk
