Обраќањето на проф. д-р Весна Мојсова-Чепишевска, македонска книжевна теоретичарка, критичарка и редовна професорка на Универзитетот „Св. Кирил и Методиј“ во Скопје, којшто беше одржан на конференцијата организирана на 14.12.2024 година од страна на Катедрата за балкански, слависти и ориентални студии на Универзитетот во Македонија во Солун, Грција, во соработка со Катедрата за филологија „Блаже Конески“ на УКИМ, е објавено на грчкиот потртал kokkini.org.
Под насловот „Скопскиот ритам се испреплетува со егејскиот ритам – Неколку зборови за македонската поезија“, пренесува грчкиот портал, пред бројниот аудиториум на Универзитетот во Солун, проф. д-р Весна Мојсова-Чепишевска говореше за Кочо Рацин, Ацо Шопов, Блаже Конески, Гане Тодоровски, Матеја Матевски, Петре М. Андреевски и Влада Урошевиќ. Но клучно, во својот реферат потсети и на македонската книжевна и културна традиција и во претходниот период.
Таа говореше на македонски, а паралелно одеше и преводот на грчки, кој за оваа конфренција го направи професорката Александра Јоаниду.
Посочувајќи дека не треба соработката да запре тука, проф. д-р Весна Мојсова-Чепишевска нагласи дека во 2025 година треба да се одбележат и 100-те години од излегувањето на АБЕЦЕДАРОТ и на ова одбележување треба да се надоврзе и 80-те години од: 5 мај 1945 кога се усвојува македонската азбука со што се кодифицира македонскиот јазик и 7 јуни 1945 кога излегува првиот Правопис на македонскиот јазик.
Грчкиот портал го пренесува и линкот од Рацин.мк кој известуваше за овој значаен настан од соработката меѓу македонските и грчките научници, писатели и преведувачи.
ИЗВОР: racin.mk
