Претстојниот состанок за кипарското прашање со учество на петте страни што на 17 и 18 март ќе се одржи во Женева, како и европската одбрана, беа во фокусот на средбата на грчкиот премиер Кирјакос Мицотакис со претседателот на Кипар Никос Христодулидис, јави дописничката на МИА од Атина.
Кипарскиот претседател на почетокот на средбата рече дека посетата на Атина е со цел со Мицотакис да разменат мислења и посочи дека „во период кога има обиди да се оспорат основните принципи на меѓународното право, суверенитетот и територијалниот интегритет, средбата во Женева е од особено значење“.
– Сакам јавно да кажам дека одам во Женева со јасен план. Многу добро знаеме што сакаме да постигнеме. Ова не е ништо повеќе од продолжување на разговорите од каде што беа прекинати во летото 2017 година, врз основа на достигнувањата на разговорите и со единствена цел да се реши кипарското прашање, врз основа на договорената рамка, на принципите и на вредности на Европската унија, истакна Христодулидис.
Паралелно нагласи дека „сè што излегува од договорената рамка воопшто не е тема за разговор“, изразувајќи задоволство што „ова е став и на меѓународната заедница“.
Грчкиот премиер истакна дека ги цени напорите на кипарскиот претседател „за да го одржи овој дијалог жив, за конечно да се постигне праведно и одржливо решение за кипарското прашање, секогаш потпирајќи се на одлуките на Обединетите нации“.
– Сакам да знаеш дека Грција, до степен до кој тоа е соодветно, ќе учествува и секогаш ќе ги поддржува овие твои напори. Имаме многу да разговараме за нашата координација пред овој многу важен состанок и со нетрпение очекувам да ги слушнам вашите ставови, рече Мицотакис.
Во однос на неформалниот Самит на ЕУ пред два дена посветен на европската одбрана, грчкиот премиер и кипарскиот претседател истакнаа дека беа потврдени цврстите позиции на Грција и Кипар за потребата Европска Унија и земјите-членки да инвестираат повеќе во одбраната.
Извор: kurir.mk
