Нема пари за повисоки плати, нема пари за работниците, ама за тропски овошја и луксузни деликатеси – има, реагираат од СДСМ по однос на јавните набавки на Владата.
За СДСМ е неверојатно со каква леснотија се трошат народните пари на приватни авиони, бизнис класи и егозитични овошја додека нема пари за повисоки плати за граѓаните.
Потенцираат дека додека граѓаните бројат денови до следната плата, Владата брои видови егзотично овошје. Папаја, манго, аспарагус, авокадо, ананас – цел тропски рај на менито на владините функционери.
Според СДСМ, премиерот кој до вчера тврдеше дека грозје не пробал, сега одеднаш од државниот буџет се издвојуваат милиони за скапи плодови што народот не може ни да ги помириса.
Венко Филипче – претседател на СДСМ
Вчера, премиерот Христијан Мицкоски рече дека банани не јадел, дека постат и дека во влада не може да живеат од воздух.
Денеска од ВМРО-ДПМНЕ со реакција дека СДСМ во недостаток на теми и продуктивни дискусии и за да ја затскрие својата дезориентираност и изгубеност опозицијата отвора теми за набавки на Владата кои автоматски и вообичаено се правеле во деведесеттите.
ВМРО-ДПМНЕ
„Венко Филипче и СДС кои се целосно дезоириентирани и се фаќаат за минорни теми. Венко Филипче и СДС кои за седум години мандат местеа само тендери, се интересираа како да стават во свој џеб најдоа да се занимаваат со небитни набавки. Ако час поскоро не одлучат што би правеле и што сакаат реално, а не декларативно толку полошо за нив. ВМРО-ДПМНЕ контиуирано работи за добро на граѓаните и за добро на Македонија. Ова го покажуваат инвестициите во општините, стопанството.Време е СДС и Филипче да се освестат.“ – реагираат од ВМРО-ДПМНЕ.
Од партијата на Левица, претходно, реагираа дека Владата наместо веднаш да го прифати предлогот на ССМ за минимална плата од 500 евра, владејачката коалиција ДПМНЕ-ЗНАМ-ВРЕДИ избра да троши народни пари на егзотични овошја и храна која е недостижна за обичниот работник: папаја, аспарагус, манго, ананас, авокадо.
Извор: 24vesti.mk
