Русија и Украина го поздравија мировниот план на Кина

На првата годишнина од руската инвазија на Украина, Кина објави документ со 12 точки во кој детално е опишан нејзиниот став за руско-украинскиот воен конфликт и во кој, меѓу другото, повикува на мировни преговори и прекин на непријателството меѓу двете страни

Москва го цени планот на Кина за решавање на конфликтот во Украина и е отворена за опцијата за постигнување на целите на „специјалната воена операција“ преку политички и дипломатски средства, изјави портпаролката на руското Министерство за надворешни работи Марија Захарова. Таа додаде дека тоа би претпоставувало признавање на „нова територијална реалност“ во Украина, пишува „Гардијан“.

Украинскиот претседател Володимир Зеленски, за време на денешната прес-конференција по повод годишнината од руската инвазија, меѓудругото, го коментираше и кинескиот мировен план.

„Добро е што Кина зборува за Украина. Пекинг нема лоши интереси. Според изјавеното, Кина го почитува нашиот територијален интегритет. Но, прашањето е што следи по тие зборови. Прашањето е во чекорите и каде ќе водат тие. Некои точки во декларацијата ми се разбирливи, а со некои не се согласувам“,

рече Зеленски.

На првата годишнина од руската инвазија на Украина, Кина објави документ со 12 точки во кој детално е опишан нејзиниот став за руско-украинскиот воен конфликт и во кој, меѓу другото, повикува на мировни преговори и прекин на непријателството меѓу двете страни.

Во документот насловен како „Позицијата на Кина за политичкото решавање на кризата во Украина“, кинеското Министерство за надворешни работи наведува дека земјата ќе продолжи да игра конструктивна улога во продолжувањето на мировните преговори.

„Конфликтот и војната никому не му користат. Сите страни мора да останат рационални и да покажат воздржаност, да избегнуваат разгорување на пламенот и влошување на тензиите и да спречат дополнително влошување на кризата или дури и излегување од контрола. Сите страни треба да ги поддржат Русија и Украина да работат во иста насока и да го продолжат директниот дијалог што е можно побрзо, за постепено да се деескалира ситуацијата и на крајот да се постигне сеопфатен прекин на огнот“,

се наведува во документот на кинеското МНР под точката која гласи „Престанок на непријателствата“.

Документот што го објави во голема мера е повторување на постојната позиција на Кина, која вклучува повикување на двете завојувани страни да ги продолжат мировните преговори.