Вработените во Македонската филхармонија и денеска излегуваат на протест пред Министерството за култура и туризам. За нив, велат, останува сомнежот дека конкурсот за избор на нов директор на оваа установа не се спроведува законски.
За време на претходните протести добија ветување од министерот за култура и туризам Зоран Љутков дека конкурсот ќе биде спроведен законски и дека ќе биде избран најдобриот кандитат кој ги исполнува условите.
– Ние добивме информации дека конкурсот веќе се спроведува незаконски, и дека по секоја цена се оди кон тоа меѓупартиски договорениот кандидат Мустафа Имери да биде назначен за директор на нашата институција, соопштија од синдикатот на Македонската филхармонија.
Посочуваат оти имаат информации дека Имери не доставил комплетна документација.
– Имаме информација дека Имери не доставил комплетна документација, иако во конкурсот јасно е назначено дека некомплетните и ненавремено доставени документи нема да се разгледуваат. Комисијата веќе им дала рок на кандитатите кои не доставиле уредна документација да ги достават потребните документи во рок од три дена. Со тоа се кршат условите пропишани во конкурсот, се со цел да се истера меѓупартискиот договор меѓу ВРЕДИ и ВМРО-ДМНЕ и да се назначи Мустафа Имери за директор на нашата институција, посочуваат во соопштението.
ИЗВОР: racin.mk
