Сојузот на синдикати на Македонија (ССМ) и бизнис секторот се согласуваат дека државата треба да ги субвенционира придонесите за повисоки плати. И двете страни предлагаат мерки за поттикнување на платите, но останува да се види дали Владата ќе ја прифати оваа иницијатива.
Организацијата на работодавачи посочува дека сличен закон за стимулирање на повисоки плати постоел и во минатото и дека би било корисно повторно да се воведе. Според нив, ако минималната плата е 24.400 денари, а работодавачот одлучи да исплати 30.000, тогаш за разликата да не се плаќаат придонеси.
ССМ, пак, предлага минималецот да се зголеми на 30.500 денари, а за разликата од 6.000 денари, работодавачите да бидат ослободени од повисоки придонеси во текот на 12 месеци. Овој модел би важел и за другите плати, не само за минималната.
Сепак, конечната одлука ја има Владата, која засега не се изјаснила дали ќе поддржи субвенционирани придонеси. Премиерот Мицкоски изјави дека Владата ќе ја следи одлуката на синдикатите и работодавачите, но ако не постигнат договор, ќе се примени законското решение за минималецот.
За нови преговори се чека Владата да формира комисија која ќе ја потврди репрезентативноста на ССМ. На следната средба ќе се разговара и за пресметката на синдикалната кошничка, што премиерот ја оспорува.
ИЗВОР: racin.mk
