Полицијата во Брчко во Босна и Херцеговина, уапси вкупно осум лица осомничени за трговија со деца, откако во куќа во градот пронашла 31 дете.
„Во рамки на досегашните активности за пронаоѓање на 31 дете, уапсени се вкупно осум лица поради сомнение за сторени кривични дела „трговија со луѓе“, „трговија со деца“ и „запуштање“ или злоупотреба на дете“, соопшти окружната полиција Брчко.
Портпаролката на окружната полиција Џевида Хукичевиќ изјави за новинарите дека истрагата за овој случај е сложена и вклучува повеќе линии на дејствување, наведувајќи дека поради сложеноста на случајот, по наредба на обвинителот, воспоставена е соработка со Агенцијата за истраги и заштита (СИПА), Министерството за внатрешни работи на Република Српска, Министерството за внатрешни работи на Херцеговскиот-неретвански кантон, како и со меѓународна соработка со Европол.
Полицијата во соработка со Центарот за социјална работа и Црвениот крст пред два дена во куќа во Брчко пронашла 31 дете, по што децата биле пренесени на безбедно место.
Медиумите во БиХ објавија дека пронајдените деца имале хрватски пасоши и дека ги чувала една жена, најверојатно италијанска државјанка, која е уапсена.
Меѓу уапсените наводно има и судски полицаец и неговата мајка.
Извор: 24vesti.mk
