ИСТАНБУЛ (АА) – Бригадите Касам, вооруженото крило на палестинската група на отпорот Хамас, денес соопштија дека вечерва ќе ги предадат телата на четворица израелски заробеници, јавува Анадолу.
Во кратката изјава портпаролот Ебу Обаида ги идентификуваше четворицата заложници како Цахи Идан, Ицик Ал-Јарит, Охад Јахаломи и Шломи Мансур.
Кабинетот на израелскиот премиер Бенјамин Нетанјаху потврди дека четирите тела ќе бидат вратени вечерва „без церемониите на Хамас“.
Израелскиот Канал 12 објави дека ослободувањето на четворицата починати заложници се очекува да се случи во 23:00 часот по локално време без церемонија.
Весникот „Хаарец“, повикувајќи се на неименуван извор, објави дека израелската затворска служба се подготвува да ги ослободи палестинските затвореници во текот на ноќта.
Предавањето е дел од договорот за прекин на огнот и размена на затвореници што стапи на сила во Газа минатиот месец, запирајќи ја деструктивната војна на Израел во која се убиени речиси 48.350 Палестинци, главно жени и деца, а енклавата ја остави во урнатини.
Портпаролот на Хамас, Хазем Касем, рано утрово изјави дека предавањето ќе се случи во замена за ослободување на стотици затвореници од страна на Израел.
„Отпорот ќе ги предаде телата на четворица израелски заробеници во замена за ослободување на одложената група палестински затвореници од страна на Израел, заедно со палестинските жени и деца“, изјави тој за Анадолу.
Тој потврди дека се обезбедени „јасни гаранции“ од посредниците и дека е договорен нов механизам за да се осигури дека Израел ќе ги исполни своите обврски. Сепак, тој не откри детали за механизмот.
Абдел Латиф ал Кануа, друг портпарол на Хамас, рече дека размената ќе продолжи „во рамките на новиот механизам што го гарантира придржувањето на Израел“.
„Египетските посредници го издејствуваа овој договор и ние остануваме посветени на неговото завршување и спроведување“, додаде тој.
По оваа размена ќе бидат завршени сите ослободувања на затвореници според првата фаза од договорот за прекин на огнот во Газа и размена на затвореници.
Првата фаза вклучува ослободување на 33 израелски заробеници и 1.737 палестински затвореници во фази во текот на шест недели.
Израел одби да ослободи 620 палестински затвореници во замена за четирите тела на израелски заробеници предадени во саботата, наведувајќи ги како што ги нарече „понижувачките церемонии на предавање“ на заложниците.
Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во енклавата.
Извор: Anadolu Agency (AA)
