ЕК ја поддржа позицијата на Рим за дефинирање на „безбедна земја“ во процесот за мигрантските центри во Албанија

Европското законодавство овозможува земјите членки на ЕУ да прогласат одредени држави за „безбедни“, дури и само за одредени точно дефинирани мигрантски групи, се наведува во мислењето на Европската комисија доставено до Европскиот суд на правдата во врска со Договорот за дислокација на мигранти склучен меѓу Италија и Албанија.

Со ова практично Еврокомисијата ја поддржа позицијата на Рим во постапката што се води пред Европскиот суд на правдата за законитоста на овој Договор, со кој на Италија и се овозможува да ги сместува мигрантите пресретнати во водите на Средоземното Море во прифатни центри во Албанија во местата Шенѓин и Ѓадер.

Постапката се фокусира на толкувањето на принципот „безбедна трета земја“, кој Италија во судскиот процес го користи за да го оправда префрлањето на мигрантите во Албанија.

Правната застапничка на Италија во процесот, Флавија Томат пред Судот тврдеше дека правото на ЕУ им дозволува на земјите членки да прогласат една држава за безбедна „дури и ако таа не мора да биде целосно безбедна, туку само за одредени категории мигранти кои се јасно дефинирани“.

Случајот се најде пред Европскиот трибунал, откако претходно Суд во Рим ја оспори легитимноста на ваквото толкување. Италијанскиот суд побара од Судот на правдата да оцени дали со националното законодавство може една земја да биде „прогласена за безбедна“ и дали „се уште може да се смета за безбедна и покрај заканите кон одредени групи“.

Центрите во Албанија, каде мигрантите би биле сместени додека се разгледуваат нивните барања за азил во Италија, беа отворени на 11 октомври минатата година, но тие останаа празни, откако Судот во Рим ја оспори легитимноста на италијанско-албанскиот Договор.

Организација МедиХоспес, која е задолжена за раководење на центрите, на почетокот на месецов на своите над сто вработени им испрати допис дека се „отпуштени до следното известување“.

За надминување на правниот спор, италијанската Влада изминативе недели најави идеја за пренамена на објектите во Албанија во „центри за репатријација“.

Според оваа идеја, во центрите во Албанија би биле сместени илегални мигранти кои од претходно се дојдени во Италија, како и оние кои чекаат депортација од земјата. Меѓутоа, ова засега останува на ниво на идеја и не е донесен никаков официјален заклучок или законски предлог во тој правец.

Конечната пресуда на Европскиот суд за правдата во врска со овој случај се очекува во мај или јуни годинава, а во меѓу време на 10 април главниот правобранител на ЕУ треба да го изнесе своето мислење за италијанските прифатни центри во Албанија. Иако мислењата на правобранителот не се обврзувачки, тие често имаат влијание врз судските одлуки.