ЕУ го усвои 16. пакет санкции кон Русија на третата годишнина од војната во Украина

ИСТАНБУЛ (АА) – Европската Унија (ЕУ) денес го усвои својот 16. пакет санкции кон Русија, насочени кон клучните сектори на нејзината економија и поединци вклучени во војната против Украина, известува Анадолу.

Овој потег доаѓа во период кога војната влезе во четврта година, а претставниците на ЕУ ја истакнаа потребата да се ослаби способноста на Москва да ја продолжи воената кампања.

Најновиот пакет вклучува економски и индивидуални рестриктивни мерки што влијаат врз руската флота во сенка, финансиските мрежи и воено-индустрискиот комплекс на Русија.

„Веќе три години Русија немилосрдно ја бомбардира Украина, обидувајќи се да украде земја што не е нејзина“, изјави Каја Калас, висока претставничка на ЕУ за надворешна политика и безбедност.

Таа истакна дека секој пакет санкции го лишува Кремљ од средства за водење војна.

Во соопштението се наведува дека Советот на ЕУ вовел санкции за 83 поединци и субјекти одговорни за поткопување на територијалниот интегритет на Украина, а истовремено ги проширува критериумите за санкционирање на оние што управуваат со руската флота во сенка, бродови што се користат за избегнување санкции за извоз на нафта.

Сега вкупно 153 брода се ограничени според мерките на ЕУ.

Првпат ЕУ воведе забрана за трансакции на странски финансиски институции што го користат рускиот систем за финансиски пораки SPFS, исто така, ги прошири и ограничувањата на 13 клучни регионални банки.

Покрај тоа, 53 субјекти се додадени на списокот на оние што го снабдуваат рускиот воено-индустриски комплекс.

Санкциите вклучуваат и нови трговски ограничувања за технологијата на беспилотни летала, хемикалии и софтвер што се од клучно значење за развој на руското оружје. Воведени се дополнителни ограничувања за извозот на индустриски материјали и увозот на руски алуминиум, значаен извор на приходи за Москва.

Осум руски медиуми обвинети за ширење пропаганда на Кремљ остануваат без дозволи за емитување во ЕУ, а нови ограничувања се воведени за руските пристаништа, транспортните мрежи и авијацијата.

Пакетот, исто така, ги проширува енергетските санкции, ограничувајќи го софтверот што се користи за истражување на нафта и гас и забранува привремено складирање на руската сурова нафта во ЕУ.

Лидерите на ЕУ ја потврдија својата посветеност да ја поддржат Украина „колку што е потребно“, а Калас истакна дека санкциите се клучен елемент во тековните напори за ставање крај на војната.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.