БЕРЛИН (АА) – Германскиот опозициски лидер Фридрих Мерц прогласи победа откако неговите демохристијани (ЦДУ/ЦСУ) освоија речиси 29 отсто од гласовите на федералните избори одржани денес, обезбедувајќи јасно водство пред останатите партии, јавува Анадолу.
„Победивме на овие избори“, им рече Мерц на партиските членови за време на славеничкиот говор во партиското седиште и ги повика своите политички ривали да ја надминат жестоката изборна кампања.
„Светот не нѐ чека нас, и не чека долги коалициски разговори. Сега мора брзо да ја вратиме нашата способност за дејствување“, рече конзервативниот лидер. Мерц истакна дека брзото формирање стабилна коалициска влада е клучно за решавање на домашните предизвици, зајакнување на позицијата на Германија во Европа и обновата на меѓународната доверба.
Последните проекции на јавниот радиодифузен сервис АРД покажуваат дека демохристијаните освојуваат 28,8 отсто од гласовите, што е раст од 24-те проценти освоени на претходните федерални избори во 2021 година. Сепак, сојузот на конзервативците ЦДУ/ЦСУ не го доби апсолутното мнозинство потребно за самостојно владеење.
Социјалдемократската партија (СПД) на канцеларот Олаф Шолц се соочи со историски пораз на изборите, на кои освојува 16,2 отсто – најнизок број гласови за партијата на левиот центар од 1949 година.
Крајно десничарската Алтернатива за Германија (AfD) и се очекуваше да го постигне својот најдобар резултат досега на федералните избори, 20,3 отсто. Со речиси двојно зголемување на освоените гласови во споредба со претходните избори, таа стана втората најмоќна политичка сила во земјата.
Зелената партија на министерката за надворешни работи Аналена Баербок освојува 12,7 отсто од гласовите, со пад од 2 отсто во споредба со претходните избори во 2021 година. Социјалистичката партија Левица го направи најголемото изненадување на изборите, освојувајќи 8,5 отсто од гласовите. Поддршката на партијата се зголеми од 3 отсто во анкетите пред три месеци, зајакната со нејзината кампања која ветуваше построго спротивставување на подемот на АфД.
Извор: Anadolu Agency (AA)
