Изјавата на првиот вицепремиер Изет Меџити дека во текот на годината ќе се вработат од 2 до 3 илјади Албанци во јавната администрација и денеска предизвика политички реакции. Опозициската СДСМ изјавата ја нарекува скандалозна и без преседан. Портпаролката Кузевска обвини за партизација на администрацијата, исто како во времето на Груевски, притоа фрлајќи сомнеж дали списокот со овие вработувања е веќе на масата на премиерот Мицкоски.
СДСМ побара Антикорупциската веднаш да дејствува и да ги стопира сите вработувања во администрацијата.
Реагираше ВМРО-ДПМНЕ, обвинувајќи ги социјалдемократите дека шират лаги, со цел да ја прикријат катастрофалната состојба во која е оставена државата.
-Тврдењата дека Владата ќе вработи 3.000 лица се целосна невистина и очаен обид на СДСМ да најде оправдување за сопствениот политички неуспех. Ако некој создаде армија на неспособни партиски војници и ја претвори државната администрација во штаб на Бихаќка, тоа е токму СДС! Ако има вработувања, тие ќе бидат исклучиво во согласност со пописот и реалните потреби на институциите, а не по партиски список како што правеше СДС, велат од ВМРО-ДПМНЕ.
Овие судири меѓу двете најголеми партии доаѓаат откако пред неколку дена за време на партиска активност првиот вицепремиер Меџити, цитиран од партијата, изјавил дека во текот на годината во администрацијата ќе се вработат 2-3 илјади Албанци. На прашањето за ова, Меџити вчера рече дека зборувал за трансформација на решенијата во здравството. Од друга страна, министерката за финансии јасно стави до знаење дека планот за вработување за 2025 година е направен минатата година и дека нема потпишано договори за вработување на етничка основа, додека министерот за администрација го замоли Меџити „да не се однесува како Алиса во земјата на чудата“ ветувајќи нешто што, според Минчев, не е ниту реално ниту возможно без да се прекршат законските постапки.
ИЗВОР: ТВ 21
