ЛОНДОН (АА) – Земјотрес со јачина од 5,1 степен според Рихтеровата скала ја погоди морската област меѓу грчките острови Аморгос и Санторини утринава, соопшти Геодинамичкиот институт на Националната опсерваторија во Атина, јавува Анадолу.
Потресот се случил пред 10 часот по локално време, а епицентарот бил на 21 километар југозападно од Аркесини, кај јужен Аморгос, на длабочина од 15 километри.
Засега нема информации за штети или повредени, но земјотресот се почувствувал во делови од Киклади, што предизвика загриженост кај жителите и локалните власти.
Според сеизмолошката лабораторија на Универзитетот во Атина (ЕКПА), од 26 јануари до 13 февруари биле регистрирани повеќе од 18.400 земјотреси на островите во архипелагот Киклади.
За Аморгос и уште три острови е прогласена вонредна состојба до 11 март.
Сеизмолозите продолжуваат да ја следат областа за потенцијални последователни потреси.
Во меѓувреме, поради сеизмичката активност во Егејското Море, Грција ги објави плановите за изградба на специјално пристаниште на Санторини за бродовите што ќе го користат во итни случаи.
Грчкиот министер за климатски кризи и цивилна заштита Василис Кикилијас во интервјуто за телевизијата АНТ1 изјави дека во случај на голем земјотрес, жителите на Санторини треба да се оддалечат од крајбрежните области и да бараат повисоки места.
По разговорите со премиерот Киријакос Мицотакис, Кикилијас рече дека Владата, во соработка со Вооружените сили на Грција, одлучила да изгради посебно пристаниште за итни случаи, покрај големото пристаниште што моментно се гради на островот.
Кикилијас истакна дека во Егејскиот Регион има голем број подводни вулкански зони и дека експертите внимателно ја следат неодамнешната активност на магмата во областа.
Тој потврди дека Владата донела одлука за изградба на пристаниште за итни случаи во соработка со грчките вооружени сили.
Извор: Anadolu Agency (AA)
