Предлогот на ВМРО ДПМНЕ, за менување на државниот грб, кој со двете раце го зграпчи министерот за здравство од редовите на Вреди, Арбен Таравари, ги стави во мирување ветените вработувања за специјализантите.
Од СДСМ велат дека и самиот Таравари вели, дека за него се приоритет етничките теми, ‘за сè друго може да се дискутира понатаму’.
„Оваа шокантна изјава на главниот политички партнер на Мицкоски, премиерот-нем набљудувач кој немо ја следи оваа состојба, е признание за целосниот дебакл на Владата да одговори на проблемите во здравствениот сектор, но и да реши било кое друго конкретно прашање кое е од интерес на граѓаните. Во отсуство на идеи и капацитет да се соочи со реалните проблеми, со децата кои умираат по клиниките, недостатокот на лекови и персонал, Таравари реши да се посвети на она што знае дека единствено може да го спаси од оваа ситуација – етничките теми и прашања. Граѓаните не се веќе наивни и овие игри одамна ги имаат прочитано. Тие бараат решенија за проблемите кои ги мачат секој ден, очекуваат помош од Владата за заштита на стандардот кој тоне, очекуваат министерот за здравство да зборува за здравство, а не да глуми патриот“, велат во СДСМ.
Според Арбен Таравари од ВЛЕН прашањето за државниот грб треба да се реши, но тоа да се направи во пакет со други отворени прашања како химната и отстранувањето на формулацијата од 20 проценти во Уставот.
„Се уште не сме ја отвориле оваа тема, но има многу неотворени теми во последните 30 години во Македонија. Мислам дека е време да се отворат некои прашања и да се решат, еднаш засекогаш. Мислам дека има повеќе теми. Непобитен факт е дека грбот и химната се меѓу ретките во постсоцијалистичките и посткомунистичките земји каде не се сменети. Значи, ние сме подготвени, зборувам во име на ВЛЕН, да ги отвориме овие разговори, но да ги решиме како пакет, некои прашања кои се нерешени со години. Тука мислам на химната,грбот, 20% во Уставот и многу други теми”, рече Таравари.
Тој денеска повторно најави дека 300 нови специјализанти ќе почнат со работа во јавните здравствени установи.
„Дваесетте јавни здравствени установи кои веќе имаат завршено нови систематизации, можат веднаш да започнат со вработување на првите 300 специјализанти, соопшти денеска министерот за здравство, Арбен Таравари. Специјализантите, најмногу гинеколози и кардиолози, се дел од првата група која е планирана да биде вработена во склоп на новите реформски мерки за подобрување на здравствениот систем“, рече Таравари.
ИЗВОР: racin.mk
