АНКАРА (АА) – Генералниот секретар на НАТО, Марк Руте, изјави дека членството во НАТО никогаш не ѝ било ветено на Украина како дел од мировен договор, јавува Анадолу.
„Никогаш не беше кажано порано, па дури ни во таа изјава на самитот во Вашингтон, дека кога ќе се постигне мировен договор за Украина, дека во тој мировен договор, тоа треба да биде НАТО, точка. Тоа не е случај“, изјави Руте за новинарите на Михенската конференција за безбедност.
Тој истакна дека „никогаш не ѝ било ветено на Украина“ дека членството во НАТО „ќе биде дел од исходот“.
Руте додаде дека работите треба да одат „чекор по чекор“, а првиот чекор е да се доведе Украина „во позиција на сила“ и да се обезбеди договор што ќе го спречи рускиот претседател Владимир Путин уште еднаш да ја нападне Украина.
Шефот на Алијансата повтори дека европските сојузници треба да трошат повеќе и додаде: „Апсолутно е јасно, ако се држиме до сегашните бројки, нема да стигнеме дотаму. Нема да бидеме безбедни за четири или пет години.“
Осврнувајќи се на улогата на Европа во можните мировни преговори, Руте рече дека европските земји сега мора „да излезат со конкретни планови: Прво, да добијат поголема воена помош за Украина. Второ, да се добие повеќе обука за Украина“.
Европа треба „да создаде ефекти на терен, да создаде ефекти во однос на плановите“, за да добие место на масата.
Шефот на НАТО, исто така, изрази тага поради нападот со автомобил извршен вчера во Минхен.
„Се надеваме дека ќе биде јасно што се случило“, рече Руте, изразувајќи надеж и дека жртвите „ќе закрепнат што е можно поскоро“.
Инцидентот се случи вчера кога автомобил влета во толпата во центарот на градот, каде што членовите на синдикатот се собраа на демонстрации.
Возачот на автомобилот, 24-годишен авганистански државјанин, брзо бил фатен од полицијата на местото на настанот.
Извор: Anadolu Agency (AA)
