АНКАРА/ИСТАНБУЛ (АА) – Турскиот претседател Реџеп Таип Ердоган рече дека никој не може да им ја земе Газа на Палестинците, отфрлајќи го предлогот на американскиот претседател Доналд Трамп да ја „преземе“ крајбрежната енклава и да го премести палестинското население во соседните арапски земји, јавува Анадолу.
Ердоган во интервју за индонезиската телевизија Нараси објавено денес изјави дека верува оти Трамп постигнува договор со израелскиот премиер Бенјамин Нетанјаху, што претставува „голема закана за светскиот мир“.
Но, турскиот претседател изрази надеж дека Соединетите Американски Држави (САД) брзо ќе ја поправат својата грешка во политиката.
Тој рече дека „исламскиот свет не може да каже да на ова“.
Организацијата за исламска соработка (ОИС) ќе заземе цврст став против ова, рече тој, додавајќи дека ниту Туркије, ниту Индонезија и Пакистан не можат да поддржат таков предлог.
Ердоган потсети: „Пред сè, ако е неопходно да се поддржи светскиот мир, Америка е првенствено одговорна за тоа. Земја како Америка треба да биде за мир во светот“.
Тој нагласи дека Анкара отсекогаш го поддржувала светскиот мир и дека Индонезија, Пакистан и Малезија се согласуваат со Туркије за ова прашање и ќе продолжат да работат за тоа.
На 4 февруари, Трамп рече дека САД ќе ја „преземат“ Газа и ќе ги преселат Палестинците на друго место според вонреден план за обнова за кој тој истакна дека може да ја претвори енклавата во „Ривиера на Блискиот Исток“.
Неговиот предлог наиде на голема осуда од Палестинците, арапските земји и многу други земји низ светот, меѓу кои и Канада, Франција, Германија и Велика Британија.
– Поддршката на САД за Израел –
„Погледнете ја Палестина… болниците и училиштата се уништени. Го сметаме ова за нехуман пристап… го сметаме за нехуман чин“, рече турскиот претседател.
Тој за израелскиот премиер Бенјамин Нетанјаху рече дека е „гангстер“, кој ги избегнал и домашните судски власти и одлуките на Меѓународниот кривичен суд (МКС).
„Тие ја почитуваат одлуката на Меѓународниот кривичен суд за апсењето на Нетанјаху и ја чекаат нејзината примена“, додаде тој.
Турскиот претседател го критикуваше американското противење и отпорот против меѓународното судство, велејќи: „Невозможно е да се одобри тоа. Ние сме за правда. Ние инсистираме да се почитува одлуката на меѓународното судство и ќе продолжиме да го правиме тоа“.
Ердоган го пофали МКС за најточната одлука за ова прашање и додаде: „Се разбира, ја поддржуваме Јужноафриканската Република. Таа го направи првиот чекор, и заедно со неа ја поддржуваме таа одлука и чекаме нејзино спроведување.“
Договорот за прекин на огнот е во сила во Газа од 19 јануари, кој ја прекина геноцидната војна на Израел, во која се убиени над 48.200 Палестинци, а енклавата оставена во урнатини.
Меѓународниот кривичен суд во ноември минатата година издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во енклавата.
– Односите меѓу Туркије и Индонезија –
Турскиот претседател Ердоган истакна дека односите меѓу Туркије и Индонезија се засноваат на „400 години историја“ и дека тие продолжуваат.
Тој рече дека биле одржани различни состаноци меѓу институциите на двете земји, и дека се потпишани договори.
„Со овие 12 договори, ги доведовме односите меѓу Туркије и Индонезија до многу посилна, многу посилна точка“, додаде Ердоган.
Извор: Anadolu Agency (AA)
