Здружението за естетска медицина, во соработка со стручни здруженија од областа, иницира измена и дополнување на Законот за јавно здравје, со фокус на регулирање на медицинските естетски процедури. Подносители на иницијативата се Здружението на дерматовенеролози на Македонија, Македонската асоцијација на пластични, реконструктивни и естетски хирурзи и Здружението за естетска медицина.
-Предложените законски измени имаат за цел да го спречат извршувањето на естетски медицински интервенции од лица без соодветна медицинска квалификација. Со ова ќе се подигнат стандардите за безбедност и квалитет, спречувајќи несоодветна примена на процедури што можат да го загрозат здравјето на пациентите, велат тие.
Во постојниот Закон за јавно здравје, одредени интервенции како што се тетоважите, пирсингот и акупунктурата се третираат на исто ниво со медицински процедури како што се инјектирање на филери, ласерски третмани и липосукција.
-Оваа недореченост, особено во член 33, создава правна сива зона што овозможува немедицински лица да спроведуваат интервенции кои треба да бидат во надлежност на здравствени професионалци, вели специјалистот по дерматовенерологија Анџела Илиева.
Во насока на подигнување на свеста и стручната едукација, на 22 февруари 2025 година во Скопје ќе се одржи Шестиот симпозиум за естетска медицина со меѓународно учество. Настанот ќе собере реномирани експерти од земјата и регионот, кои ќе ги презентираат најновите трендови и достигнувања во областа.
–Естетската медицина бара високо ниво на стручност и прецизност. Со предложените законски измени, ќе обезбедиме поголема заштита на пациентите и ќе воспоставиме јасни критериуми за спроведување на овие процедури. Истовремено, со симпозиумот создаваме платформа за професионален развој и унапредување на оваа медицинска гранка“, изјави претседателот на Здружението за естетска медицина Игор Пеев.
Здружението ги повикува сите засегнати страни – медицински професионалци, институции и медиуми – да ја поддржат оваа иницијатива со цел заштита на јавното здравје и унапредување на професионалните стандарди во естетската медицина.
ИЗВОР: racin.mk
