Со затворање на избирачките места во 19 часот, заврши и гласањето на парламентарните избори во Косово, јавува Анадолу. Според последните податоци на Централната изборна комисија (ЦИК), до 15 часот своето право на глас го искористиле 28,32 отсто или 558.246 од вкупно регистрираните 1.970.944 гласачи.
Вкупниот број на косовски граѓани со право на глас изнесува 2.075.868 гласачи, од кои денеска во границите на Косово, од 7 до 19 часот, имаа можност да гласаат 1.970.944 гласачи.
Во однос на гласањето надвор од Косово, право на глас имаа 104.924 граѓани кои живеат во дијаспората, кои имаа можност да го остварат ова право од 9 јануари до 8 февруари.
Косовските гласачи можеа да гласаат во 941 гласачки центар низ земјата. Вкупно 28 изборни листи со вкупно 1.280 кандидати заверени од Централната изборна комисија (ЦИК) беа дел од изборната трка за 120 пратенички места во косовскиот Парламент . Меѓу 28-те изборни листи, 20 беа политички партии, пет коалиции, две граѓански иницијативи и еден независен кандидат.
Бројот на набљудувачи во овој изборен процес изнесува над 18 илјади. Процесот го следеа и над 100 набљудувачи на Европската Унија, од 18 различни земји на ЕУ, на покана на косовската претседателка Вјоса Османи.
Редовните парламентарни избори во Косово се одржаа за прв пат од 2007 година. Во меѓувреме петпати се одржаа предвремени избори.
Извор: 24vesti.mk
