Во периодот од 1 до 4 февруари 2025 година, во рамките на платформата „ОМНИБУС“ беше спроведена телефонска анкета на репрезентативен примерок од 1.150 испитаници од целата територија на Република Македонија.
Анкетата била насочена кон мерење на јавното мислење на граѓаните на теми поврзани со меѓуетничките односи. Целта на истражувањето беше да се добијат релевантни податоци за перцепциите, ставовите и искуствата на граѓаните во однос на меѓуетничките односи, нивниот развој и можностите за подобрување.
Анкетата била дизајнирана да обезбеди анонимни одговори, гарантирајќи искреност и точност во резултатите.
Прашањата во анкетата биле формулирани така што ќе обезбедат систематски увид во јавното мислење, покривајќи различни аспекти на меѓуетничките односи.
Вклучени биле:
– квантификативни прашања со скали за мерење на ставови (на пример, од 1 до 5);
– дихотомни прашања (да/не);
– перцептивни прашања за тоа како граѓаните ја оценуваат моменталната состојба и идниот развој на меѓуетничките односи.
Овие методолошки пристапи овозможиле детална анализа на трендовите, разликите во перцепциите и клучните фактори што влијаат врз јавното мислење.
И покрај тоа што значителен дел од испитаниците сметаат дека развојот на меѓуетничките односи е приоритет за Владата, анкетираните во исто време препознаваат политичката злоупотреба на етничките прашања како значајна пречка во овој процес.
Податоците покажуваат дека мнозинството граѓани веруваат дека одредени политички партии намерно предизвикуваат меѓуетнички тензии со цел да ја поткопаат борбата против криминалот и корупцијата во институциите. Овие наоди сугерираат дека, иако постои свест за важноста на меѓуетничките односи, граѓаните се свесни и за предизвиците што произлегуваат
од нивната политичка инструментализација.
Резултатите од анкетата покажуваат и стабилност во меѓуетничките односи. Имено, повеќето испитаници сметаат дека состојбата се подобрува или останува иста, при што младите генерации се гледаат како поотворени и потолерантни во однос на постарите.
ИЗВОР: kurir.mk
