Претседателката на Форум на жени на СДСМ, Даниела Колева во 24 анализа рече дека разрешувањето на членовите на Судски совет е предвидено со Закон. Според неа, потребно е да се формира надпартиско тело за започнување на некакви реформи во судството.
„Зборот мучуриште што го употреби премиерот Мицкоски за Судски совет е недолично. Лицемерно е од страна на премиерот да кажува дека треба да се тргне судство од партиите а во исто време да се назначува челн на Судски совет, сопруга на актуелен градоначалник од ВМРО-ДПМНЕ, знаеме и сведоци сме дека 11 години имавме партизирано судство и тоа ја уништи државата и тоа се исти судии кои ги бираа од ВМРО-ДПМНЕ и судеја во нивна корист“, изјави Колева и додаде дека ќе верува во независно судство кога ќе види дека членови на ВМРО-ДПМНЕ ќе бидат изведени пред органите на прогон.
Според неа иако во минатото имало можност за консензус сепак тогашната опозиција не сакала да прифати.
„Имаше прилика за консензус и во минатото, јас бев редовна во Собрание и не видов тогаш да поднесе некоја иницијатива да се формира работна група од страна на ВМРО-ДПМНЕ и да сите заедно покренем реформи. Имавме прилика подадовме рака но немаше иницијатива затоа што тие имаа агенда и план а тоа е да се плука и оцрнува се она што ние правевме за граѓаните“, рече Колева.
Извор: 24vesti.mk
