Незадоволството од високите цени во маркетите се проширува низ регионот. По успешните бојкоти во неколку земји, слични иницијативи веќе се организираат во Косово, Бугарија и Грција. Граѓаните реагираат на цените кои во некои од овие држави се повисоки и од оние во ЕУ, и покрај тоа што стандардот и платите се далеку пониски, а властите не преземаат мерки. И покрај социјалните кошниќчки кои изминатиот период ги промовираа политичарите, сепак инспекторатите не си ја завршиле работата, а граѓаните останаа во милост и немилост на волјата на маркетите.
На социјалните мрежи во Македонија се најавува нов бојкот за утре, под слоганот „Црн петок за маркетите“. Минатонеделниот бојкот го намалил прометот во маркетите за 47%, според податоците на УЈП.
Во Хрватска, платформата „Ало, инспекторе“ повикува на нов генерален бојкот на продавниците и услугите на 7 февруари, како и седумдневен бојкот на одреден малопродажен синџир.
Во Србија, по бојкотот на 31 јануари, здружението „Ефектива“ повика на нов бран на протест. Исто така, во Косово на 10 февруари граѓаните се повикуваат целосно да ги избегнуваат супермаркетите, додека во Бугарија протестот е закажан за 13 февруари, а во Грција на 19 февруари.
Незадоволството е сè погласно, а граѓаните од регионот јасно ставаат до знаење дека нема да толерираат ценовно самоволие.
ИЗВОР: racin.mk
