АНКАРА (АА) – Низ турскиот воздушен простор минатата година реализирани се 2,3 милиони летови, вклучително и над половина милион прелети, покажуваат официјалните податоци собрани од Анадолу.
Бројот на летови е зголемен за 5,5 отсто на годишна основа минатата година, што значи еден лет на секои 14 секунди на турското небо, се вели во податоците на Дирекцијата на Државната управа за аеродроми.
Од 2002 година, бројот на земји со коишто Туркије има договори за воздушен транспорт е зголемен повеќе од двојно, од 81 на 175, а бројот на меѓународни дестинации се зголеми од 60 во 50 земји на 349 дестинации во 132 земји.
До крајот на 2024 година, во рамки на домашниот воздушен сообраќај реализирани се 902.078, а во меѓународниот сообраќај 866.779 летови.
Бројот на комерцијални летови беше 1,4 милиони.
Турскиот министер за сообраќај и инфраструктура, Абдулкадир Уралоглу, рече дека поволната географска положба и културолошката позиционираност на Туркије на пресекот на континентите, многуте цивилизации и транспортни коридори го овозможија овој нејзин успех. Бројот на активни аеродроми во земјата се зголеми од 26 во 2002 година на 58 минатата година.
Уралоглу истакна дека со инвестициите реализирани во последните 22 години, Туркије може да се пофали со најшироката мрежа на летови во светот.
„Можеме да достигнеме до 1,5 милијарди луѓе и бруто-домашен производ (БДП) од 51,2 билиони долари во радиус на лет од четири часа, бидејќи Туркије има централна позиција во однос на 67 земји“, рече тој.
„Оваа година ќе се стремиме да обезбедиме континуиран успех на нашата цивилна авијација, да го подигнеме задоволството на нашите патници и да ја обезбедиме потребната опрема со проекти поволни за животната средина“, додаде тој.
Извор: Anadolu Agency (AA)
