АНКАРА (АА) – Министерството за надворешни работи на Туркије ја осуди одлуката на Израел да ги забрани активностите на Агенцијата на Обединетите нации за помош и работа на палестинските бегалци на Блискиот Исток (УНРВА) на окупираните палестински територии, известува Анадолу.
Турското МНР објави писмено соопштение во кое нагласи дека одлуката на Израел да ги забрани активностите на УНРВА на окупираните палестински територии претставува јасно кршење на меѓународното право.
Во соопштението се вели:
„Го осудуваме овој чекор, кој претставува нова фаза на израелската окупациска и анекциска политика насочена кон присилно раселување на Палестинците од нивните земји. Исто така, јасно е дека со оваа одлука Израел има за цел да го елиминира правото на враќање на палестинските бегалци.“
Наведувајќи дека УНРВА, која е формирана од Генералното собрание на Обединетите нации (ОН) во 1949 година и ги продолжува своите активности со силна поддршка на земјите членки на ОН, обезбедува хуманитарна помош и основни услуги за милиони Палестинци во најтешки услови, во соопштението се истакнува:
„Во овој критичен период ја повикуваме меѓународната заедница да ја поддржи УНРВА и да ги преземе неопходните чекори за регионален мир. Туркије ќе продолжи да ја поддржува УНРВА и одлучно да ги брани правата на палестинскиот народ.“
Извор: Anadolu Agency (AA)
