Владата на Израел го одложи просецот за носење на судските реформи

Ваквата одлука денеска ја соопшти израелскиот министер за национална безбедност Итамар Бен Гвир кој нагласи дека се согласил со премиерот Бенјамин Нетанјаху за одложување на легислативата во периодот до 30 април кога Кнесетот (парламентот на Израел) ќе биде на пауза поради празникот Пасха

Процесот на дискусии за носење на спорниот план за реформа во правосудството во Израел ќе биде ставен во мирување откако Израелците со масовни протести и штрајкови ја парализираа земјата.

Ваквата одлука денеска ја соопшти израелскиот министер за национална безбедност Итамар Бен Гвир кој нагласи дека се согласил со премиерот Бенјамин Нетанјаху за одложување на легислативата во периодот до 30 април, кога Кнесетот (парламентот на Израел) ќе биде на пауза поради празникот Пасха.

Гвир, кој е и лидер на екстремно десничарската партија Еврејски сили, сепак, инсистира на тоа дека законот за реформи во правосудството ќе дојде на гласање во летниот мандат на парламентот кој трае од 30 април до 30 јули.

Изјавата на израелскиот министер за национална безбедност доаѓа кога делови од Израел се целосно блокирани поради масовните протести против планот за реформи во правосудството, но и поради отпуштањето на министерот за одбрана на Израел кој се изјасни против ваквите реформи.

Во објава на Твитер, премиерот на Израел, Бенјамин Нетанјаху, апелираше до демонстрантите „да се однесуваат одговорно“ и „да се воздржат од насилство“. Тој требаше да ѝ се обрати на јавноста утринава, но своето обраќање го презакажа за попладне.

Во меѓувреме, Белата куќа објави соопштение во кое изрази длабока загриженост за состојбата во Израел и ги повика израелските лидери да најдат компромис по однос на ова прашање што е можно поскоро.

Предлог-реформите во правосудството беа објавени од израелската влада во јануари годинава, тврдејќи дека тие се потребни за да се врати рамнотежата меѓу извршната и судската власт. Реформите ќе ѝ дадат на владата влијание во изборот на судии и ќе ја ограничат моќта на Врховниот суд да ги укинува законите.

Противниците на законските измени велат дека владејачката коалиција – најдесничарската во историјата на Израел – се обидува да ја уништи поделбата на власта во Израел, ставајќи ја земјата на авторитарен пат.