ГАЗИАНТЕП (АА) – Осумгодишното момче Семих Еге Инџе е извлечено од урнатините 155 часа по земјотресите што во понеделникот ги потресоа јужните делови на Туркије, известува Анадолу.
Спасувачите го извлекоа момчето од урнатините на зграда во Газиантеп, а со возило на Итната помош е префрлено во болница.
„Најмалку 24.617 лица загинаа во двата разорни земјотреси што ги потресоа јужните региони на Туркије“, соопшти потпретседателот на оваа земја, Фуат Октај.
Два разорни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
Бројни спасувачки екипи сè уште ревносно работат на пребарување и спасување на луѓето затрупани во урнатините на зградите.
Извор: www.aa.com.tr
