Оштетена во земјотресот, црквата Св. Никола во Туркије ја доживеа истата судбина како и пред 151 година

ХАТАЈ (АА) – ФЕРДИ УЗУН/МЕХМЕТ ЧАЛИК –

Грчката православна црква „Свети Никола“ е оштетена во земјотресите што на почетокот на месецот ја погодија јужна Туркије, јавува Анадолу.

Црквата ја доживеа истата судбина како и пред 151 година, кога подрачјето беше погодено од земјотрес.

Дел од Грчката православна црква во Искендерун е уништен во земјотресите што ја погодија Туркије на 6 февруари.

Џем Тејмур, директор на Фондацијата на Грчката православна црква, рече дека црквата е затворена за молитва. Потсети дека слична судбина доживеала и пред 151 година, кога била отворена.

„Почна да се гради во 1860-тите, беше изградена, а откако беше отворена, беше оштетена во големиот и разорен земјотрес што се случи во Хатај во 1872 година. Повторно беше отворена за богослужба во 1876 година“, изјави Тејмур за Анадолу.

Тој се надева дека брзо ќе се санираат штетите. Како што рече, црквата на 6 февруари претрпела сериозно оштетување.

„Предната фасада е целосно уништена. Ѕидовите на источната и западната страна на задниот дел се целосно одвоени. Бидејќи нашата црква е сериозно оштетена, не може да се одвива богослужбата“, рече Тејмур.

Како што истакна, ова подрачје е погодено од голема катастрофа.

„Тоа е голема катастрофа. Навистина сè уште сме во шок. Не се радувам што го преживеав земјотресот затоа што загинаа многу наши пријатели, сограѓани… Ова е наша татковина, ова е наш град каде што ја делиме среќата и болката. Се надевам дека повторно заедно ќе доживееме убави денови“, порача Тејмур.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS).