Ви благодарам за поддршката во првиот круг. Нијанси фалеа за да се заврши работата уште во првиот круг, но ние сме ВМРО-ДПМНЕ, ние одиме по потешкиот пат, ката што во втор круг убеден сум дека победата и довербата ќе бидат уште поголеми и Марија ќе биде следниот градоначалник на општина Неготино, рече претседателот на ВМРО-ДПМНЕ, Христијан Мицкоски на денешниот настан во Неготино во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември.
Мицкоски се осврна и на тоа дека на овие избори граѓаните јасно ја изразија својата волја и довербата која ја дадоа на ВМРО-ДПМНЕ и Коалицијата каде што во првиот круг освои 33 градоначалници, наспроти три од СДСМ, а тоа е отприлика победа 11 спрема еден, а во втор круг влезе во 26 општини, меѓу кои е и општина Неготино.
„Веќе во две општини противниците на нашите кандидати се откажаа, тоа е општина Македонски Брод и општина Могила, така што можеме да кажеме дека во овој момент коалицијата којашто ја предводи ВМРО-ДПМНЕ има 35 градоначалника и уште во 24 општини е во вториот круг. Тоа се 59 потенцијални градоначалници. Ние ќе се бориме за секој еден човек, никого нема да го оставиме во позадина, ќе ги дадеме сите сили и ќе ја вложиме сета енергија што ја поседуваме да добиеме дополнителни сега веќе, 24 градоначалника и со тоа да заокружиме бројка од 59 градоначалници. Нешто што историски ќе значи најголем триумф на македонската политичка сцена“, истакна Мицкоски.
Додаде дека ВМРО-ДПМНЕ на овие избори е апсолутен победник и ако на изборот на градоначалници се додадат и 58 општини каде што ВМРО-ДПМНЕ победи за советот или има мнозинство, што зборува дека поддршката на граѓаните е недвосмислена за политиките на Владата, но и за сето она коешто градоначалниците на ВМРО-ДПМНЕ и Коалиција го сработија изминатите четири години.
„Не смееме да заборавиме уште еден друг факт, а тоа е дека нашиот кандидат за градоначалник на Град Скопје има убедлива предност во однос на својот противкандидат, од 92, 93 илјади гласа на наспроти 30, тоа повеќе од 3 спрема 1 и очекуваме таа бројка на биде преку 125, преку 130 илјади освоени гласови на овие локални избори во вториот круг. Ако на ова се додаде и победата на советничката листа на коалицијата предводена од ВМРО-ДПМНЕ за Град Скопје, тогаш заокружуваме фантастични 60 општини. До сега тоа никогаш во Македонија не се случило, една коалиција да победи во 60 општини. Навистина историски резултат“, рече Мицкоски.
Меѓу другото, Мицкоски повика, во вториот круг на 2 ноември да се излезе масовно на гласање, да се заокружи број 9 и со тоа да се потврди историски најголемата победа во Македонија и да продолжи развојот на државата и општините.
Извор: kurir.mk
