Речиси 56% од граѓаните на С Македонија се против преговарачката рамка која Владата ја договори со Европската унија и сметаат дека со овој договор, земјата се става во потчинета положба. Според истражувањето на „Детектор“, разликата во гласовите „за“ и „против“ е евидентна кај различни етнички групи, па така, дури 70% од етничките Македонци одговориле дека се против, додека пак дури 75% од Албанците дале поддршка на преговарачката рамка.
Поддршка за рамката дале 13,2% од Македонците, а против биле само 11,5% етнички Албанци. Најмалку граѓани кои се противат на преговарачката рамка има во Полошкиот регион, додека пак најмногу во Вардарскиот без Скопје и Југоистокот. Според анкетата, граѓаните се поделени и околу можноста за репреговарање за нова рамка, односно 37,1% сметаат дека тоа е можна опција, додека пак 36,4% сметаат дека тоа не е опција.
„Тука нема некоја голема разлика меѓу ставовите на доминантните етнички групи. Кај Македонците 36,3 отсто сметаат дека може, а 36,7 отсто дека не може повторно да се преговара за нова рамка. Кај етничките Албанци, 40,6 отсто се на ставот дека е можно да се договори и нова преговарачка рамка, додека 34,9 отсто дека не може“,
покажува анкетата
Речиси две третини од граѓаните сметаат дека се доволно запознаени со францускиот предлог, но речиси половина од нив не прават разлика помеѓу предлогот и преговарачката рамка.
„Од анкетираните 50,9 отсто сметаат дека преговарачката рамка е на штета на македонските национални интереси и се согласуваат со тврдењето дека оваа преговарачка рамка ја става земјава во потчинета положба и претставува вовед во бугаризација, а само 21 отсто се согласуваат со тврдењето дека преговарачката рамка ги зема предвид повеќето македонски барања и го гарантира македонскиот идентитет. Но Македонците и Албанците имаат дијаметрално спротивни ставови. Додека 62 отсто од Македонците сметаат дека преговарачката рамка е вовед во бугаризација, дури 54,4 отсто од Албанците се на ставот дека преговарачката рамка го гарантира македонскиот идентитет, се истакнува во анкетата“,
стои во анкетата.
Најзагрижени дека преговарачката рамка е некаков вовед во бугаризација се повозрасните и граѓаните меѓу 30 и 39 годишна возраст, додека пак најмала е загриженоста кај помладите луѓе. Близу половина од граѓаните или 48,4 отсто сметаат дека има многу дезинформации по ова прашање, додека 26,9 отсто велат дека нема дезинформации, се посочува во анкетата.
ИЗВОР: 360stepeni.mk
