Кина објави мировен план за решавање на руско-украинскиот конфликт

Во документот од 12 точки што го објави Кина, меѓу другото, се нагласува дека суверенитетот, независноста и територијалниот интегритет на сите земји мора ефективно да се поддржуваат согласно Повелбата од ОН. Пекинг, притоа, јасно не го признава кршењето на суверенитетот на Украина од страна на Русија

Пекинг повикува и на прекин на едностраните санкции, кои, како што вели, не можат да го решат проблемот туку само да создадат нови

На првата годишнина од руската инвазија на Украина, Кина објави документ со 12 точки во кој детално е опишан нејзиниот став за руско-украинскиот воен конфликт и во кој, меѓу другото, повикува на мировни преговори и прекин на непријателството меѓу двете страни.

Во документот насловен како „Позицијата на Кина за политичкото решавање на кризата во Украина“, кинеското Министерство за надворешни работи наведува дека земјата ќе продолжи да игра конструктивна улога во продолжувањето на мировните преговори.

„Конфликтот и војната никому не му користат. Сите страни мора да останат рационални и да покажат воздржаност, да избегнуваат разгорување на пламенот и влошување на тензиите и да спречат дополнително влошување на кризата или дури и излегување од контрола. Сите страни треба да ги поддржат Русија и Украина да работат во иста насока и да го продолжат директниот дијалог што е можно побрзо, за постепено да се деескалира ситуацијата и на крајот да се постигне сеопфатен прекин на огнот“,

се наведува во документот на кинеското МНР под точката која гласи „Престанок на непријателствата“.

Документот што го објави во голема мера е повторување на постојната позиција на Кина, која вклучува повикување на двете завојувани страни да ги продолжат мировните преговори. 

„Дијалогот и преговорите се единственото одржливо решение за украинската криза“,

се вели во соопштението и дополнително се додава оти Кина и во иднина ќе игра конструктивна улога, притоа не прецизирајќи ги деталите.

Во документот се нагласува дека суверенитетот, независноста и територијалниот интегритет на сите земји мора ефективно да се поддржуваат согласно Повелбата од ОН. Пекинг, притоа, не го признава кршењето на суверенитетот на Украина од страна на Русија.

Си-ен-ен пишува дека документот претставува тенко прикриена критика на САД бидејќи во една од дванаесетте точки Кина повикува на напуштање на „менталитетот на Студената војна“.

„Безбедноста на еден регион не треба да се постигнува со зајакнување или проширување на воените блокови. Сите страни треба, следејќи ја визијата за заедничка, сеопфатна, кооперативна и одржлива безбедност и имајќи го предвид долгорочниот мир и стабилност во светот, да помогнат во создавањето избалансирана, ефективна и одржлива европска безбедносна архитектура“,

гласи точката „Напуштање на менталитетот на Студената војна“.

Во документот објавен од кинеското МНР, Кина повикува и на прекин на едностраните санкции, кои, како што вели, не можат да го решат проблемот туку само да создадат нови.

Меѓу другото, Пекинг е на став дека не смее да се водат нуклеарни војни и дека е против употреба на нуклеарно, хемиско и биолошко оружје од која било земја и под какви било околности. Исто така, се предупредува на опасност од вооружени напади врз нуклеарни централи или други нуклеарни постројки. 

Во документот во кој детално го објавува својот став за руско-украинскиот конфликт, Кина посочува и на решавање на хуманитарната криза, олеснување на извозот на жито, одржување на стабилни индустриски и синџири на снабдување како и заштита на цивилите и воените заробеници од двете страни, а ја повикува меѓународната заедница и на поддршка при постконфликтната обнова во конфликтните зони.

Една година од почетокот на руската војна во Украина: Зеленски оптимист дека оваа ќе биде година на победа