Каде е Болсонаро: Сопругата тврди дека е во болница во Флорида

Болсонаро во текот на неговиот претседателски мандат повремено се бореше со болки во стомакот откако беше избоден со нож на предизборен митинг во септември 2018 година

Поранешниот претседател на Бразил Жаир Болсонаро, чиј поддржувачи вчера упаднаа во бразилските Конгресот, претседателската палата и Врховниот суд, е хоспитализиран во болница во Орландо во Флорида, САД, соопшти неговата сопруга, Мишел Болсонаро.

Претходно и бразилскиот медиум „О Глобо“ неофицијално објави дека денеска наутро тој бил однесен во болница во близина на Орландо.

Неговата сопруга информацијата ја потврди преку објава на Инстаграм наведувајќи дека нејзиниот сопруг е под опсервација поради „абдоминална непријатност“.

„Ројтерс“, пак, повикувајќи се на извор близок до семејството пишува дека состојбата на поранешниот претседател на Бразил не е загрижувачка.

Болсонаро во текот на неговиот претседателски мандат повремено се бореше со болки во стомакот откако беше избоден со нож на предизборен митинг во септември 2018 година.

Бразил: Бројот на уапсени приврзаници на Болсонаро порасна на околу 1 500

Тој важи за ултрадесничар, кој на последните избори ја загуби власта од неговиот кандидат и поранешен претседател на Бразил, Луис Инасио Лула да Силва, кој ја презеде функцијата од 1 јануари годинава.

Болсонаро не го призна поразот и пред десетина дена го напушти Бразил и отпатува во САД со што одбегна да присуствува на примопредавањето на власта.

Лула положи заклетва како претседател на Бразил, Болсонаро ја напушти земјата

По изборните резултати од 31 октомври 2022 година, и неговите поддржувачи одбиваа да се помират со поразот, а вчера извршија упад и дивееја во бразилските институции.

Лула го обвини Болсонаро за хаосот и вети дека секој вмешан ќе биде казнет, а учесниците во нападот ги нарече „вандали, неофашисти и фанатици“.

(ВИДЕО) Лула ги посети демолираните институции во Бразилија и повика да се казнат „неофашистите“ што упаднаа во Конгресот