Извештајот, заснован на повеќе од 500 интервјуа, како и сателитски снимки и посети на места за притвор и гробници, доаѓа во време кога Меѓународниот кривичен суд во Хаг се очекува да бара апсење на руски официјални лица за насилно депортирање деца од Украина и таргетирање цивилна инфраструктура
Руските напади врз цивилите во Украина, вклучително и систематско и широко распространето мачење и убиства во окупираните региони, претставуваат воени злосторства, а можеби и злосторства против човештвото, се вели во извештајот од истрагата поддржана од ОН објавен денеска, јавува Дојче веле.
Русија извршила широк опсег на воени злосторства во Украина, како што се намерни убиства, тортура и депортација на деца, се вели во извештајот. Сепак, истражителите на ОН не пронашле докази за геноцид.
„Не откривме дека имало геноцид во Украина“,
рече Ерик Мозе, шеф на Независната меѓународна истражна комисија за Украина во изјава за новинарите, иако додаде дека „забележавме дека има некои аспекти кои можат да покренат прашања за тоа злосторство… но ние сè уште немаме донесено никаков заклучок овде“.
Извештајот, заснован на повеќе од 500 интервјуа, како и сателитски снимки и посети на места за притвор и гробници, доаѓа во време кога Меѓународниот кривичен суд во Хаг се очекува да бара апсење на руски официјални лица за насилно депортирање деца од Украина и таргетирање цивилна инфраструктура.
Меѓутоа, ова би можело да се покаже тешко, освен доколку Русите не бидат заробени во Украина, бидејќи Русија нема тенденција да ги почитува барањата за екстрадиција.
Независната меѓународна истражна комисија за Украина соопшти дека руските сили извеле „неселективни и непропорционални“ напади врз Украина, прибегнале кон тортура, убиле цивили надвор од борбите и не презеле мерки за заштита на украинското население.
„Руските власти извршија многубројни прекршувања на меѓународното хуманитарно право и кршење на меѓународното право за човекови права, покрај широкиот спектар на воени злосторства“,
се вели во извештајот.
Авторите на извештајот забележале мал број очигледни прекршувања од страна на украинските сили, вклучително и едно за кое рекоа дека е под кривична истрага од украинските власти, но огромното мнозинство од нивниот извештај го резервираа за наводи против Русија.
Русија не одговори на барањата на истрагата за информации.
Извор: 360stepeni.mk
