Голем протест денеска во Белград: „Србија против насилството“

Околу 17:30 часот претставниците на опозицијата ќе постават црно платно на скалите на зградата на парламентот, а потоа со граѓаните ќе тргнат на мирна прошетка која ќе оди преку плоштадот „Никола Пашиќ“ и улиците „Крал Милан“ и „Кнез Милош“ до зградата на Владата

За денеска во 18 часот пред парламентот на Србија во Белград е закажан голем протест наречен „Србија против насилството“. Повод за протестот се двата масакри во Србија минатата недела во кои беа убиени 17 лица.

Граѓани и претставници на опозицијата ќе се соберат пред зградата на парламентот, а потоа ќе се организира мирна прошетка до владата на Србија.

Околу 17:30 часот претставниците на опозицијата ќе постават црно платно на скалите на зградата на парламентот, а потоа со граѓаните ќе тргнат на мирна прошетка која ќе оди преку плоштадот „Никола Пашиќ“ и улиците „Крал Милан“ и „Кнез Милош“ до зградата на Владата. Никој од опозицијата нема да зборува на собирот, јавува Нова.рс.

Истакнати ќе бидат повеќе барања, чија цел, како што се наведува, е да се намали нивото на насилство во Србија. Најпрво, од властите се бара да го заменат менаџментот на РЕМ (регулаторното тело за медиуми) и на Радио-телевизија Србија, да се одземе националната фреквенција на телевизиските станици Пинк и Хепи, како и да се забранат таблоидите кои промовираат насилство.

Опозицијата бара и итна седница на парламентот на Србија на која ќе се расправа за владината одговорност за трагедиите во основното училиште „Владислав Рибникар“ во белградско Врачар и во селата Дубона, Мало Орашје и Шепшин, како и за безбедносната состојба во земјата.

По оставката на министерот за образование Бранко Ружиќ, се бара разрешување на министерот за полиција Бранислав Гашиќ и директорот на БИА (Агенција за безбедност на Србија) Александар Вулин.

Српскиот министер за образование поднесе оставка: Солзите за трагедијата вечно ќе ги носам како печат на душата

* Поврзани вести:

Пребарувал како да избегне затворска казна – завршено вештачењето на телефонот на момчето кое пукаше во белградското училиште

Осомничениот за масакрот кај Младеновац признал дека пукал во луѓето, одреден му е притвор

Потресни сведоштва на лекарите за масовните убиства во Србија: Ми се јави ќерка ми од соседната училница