(ФОТО) Македонски државјанин фатен при шверц на 9,7 литри ракија и над 10 илјади кутии цигари во Хрватска

Македонецот кој се обидел да ја прошверцува стоката треба да плати парична казна во износ од 13 272 евра, а како што додаваат од хрватската царина, пресметана и наплатена е акциза за цигари во износ од 1 419 евра

Македонски државјанин е фатен при обид за шверц на 9,7 литри ракија и над 10 илјади кутии цигари на граничниот премин „Товарник“ во Хрватска, објави хрватската Царинска управа на својата веб-страница.

Возилото во кое била скриена стоката било со швајцарски регистарски таблички.

„При детален преглед на споменатото возило, во просторот на резервното тркало биле пронајдени 6 600 парчиња цигари ‘Вест Силвер’, 4 000 парчиња цигари ‘Жаде Ла Розе’ и 9,7 литри ракија, стока се пропишани забрани и ограничувања при увоз, а кои возачот се обидел на скришен начин да ги внесе на подрачјето на Унијата“,

се наведува во соопштението на хрватската царина.

Оттаму додаваат дека пронајдената стока е запленета.

Македонецот кој се обидел да ја прошверцува стоката треба да плати парична казна во износ од 13 272 евра, а како што додаваат од царината, пресметана и наплатена е акциза за цигари во износ од 1 419 евра.