Иако нагласија дека ќе станат членки во НАТО во исто време, сега шведскиот премиер Улф Кристерсон признава дека не е исклучено одлуките за прием на двете земји да бидат ратификувани во различни фази. Додаде дека конечната одлука е во рацете на Турција и дека Шведска е подготвена да прифати прва во Алијансата да влезе Финска
Финска најверојатно ќе му се приклучи на НАТО пред Шведска поради противењето на Турција, изјави шведскиот премиер Улф Кристерсон на денешната прес-конференција во Стокхолм.
Кристерсон рече дека пред Самитот на НАТО во Мадрид во јуни е јасно дека патот на Финска до членство во Алијансата е полесен од оној на Шведска и оти е сè поизвесно дека Финска ќе биде прва што ќе влезе во НАТО.
Шведска и Финска аплицираа за влез во НАТО минатата година откако Русија ја нападна Украина, но особено Шведска се соочи со неочекувани приговори од Турција. Анкара го обвинува Стокхолм дека засолнува членови на терористички групи и бара нивна екстрадиција како чекор кон давање зелено светло на Шведска за членство во НАТО.
Откако ја објавија својата намера да се приклучат на Алијансата во мај минатата година, Финска и Шведска нагласија дека ќе станат членки на НАТО „рака под рака“ во исто време.
Сепак, шведскиот премиер признава дека не е исклучено одлуките за прием на Шведска и Финска да бидат ратификувани во различни фази. Додаде дека конечната одлука е во рацете на Турција и дека Шведска е подготвена да прифати прва во Алијансата да влезе Финска.
„Во суштина, не е прашање дали Шведска ќе стане членка на НАТО, туку кога“,
рече шведскиот премиер.
Сите 30 земји членки на НАТО мора да го одобрат новото пристапување кон Алијансата.
Извор: 360stepeni.mk
