ВРЕДИ остро реагираше на повикот на ДУИ за предвремени парламентарни избори, обвинувајќи ја партијата на Али Ахмети дека и по поразот на локалните избори не презела политичка одговорност.
Од ВРЕДИ велат дека ДУИ пред да бара ново изборно соочување треба да објасни зошто ниту еден од нејзините функционери не понел одговорност по изборните резултати.
„Во ДУИ добро знаат дека пред неполна година Албанците со глас ги исфрлија од сите општини со албанско мнозинство и дека секое ново соочување со граѓаните за нив значи уште една шлаканица“, порачаа од ВРЕДИ.
Според владејачката коалиција, изборниот пораз во ДУИ не довел до повлекувања, туку до задржување или дури унапредување на дел од функционерите.
Од ВРЕДИ го посочуваат Али Ахмети, за кого велат дека продолжил со најавите за повлекување, како и Бујар Османи, кој, според нив, и по поразот во Чаир останал потпретседател и еден од главните претенденти за раководната позиција во партијата.
Во реакцијата се наведува и Бајрам Реџепи, за кого ВРЕДИ посочува дека по поразот во Тетово останал во партиското претседателство, додека за Фатон Ахмети тврдат дека по изборниот пораз добил две нови функции – потпретседател и шеф на кабинетот на Али Ахмети.
Од ВРЕДИ додаваат дека слична слика, според нив, има и во Арачиново, Боговиње, Теарце, Струга, Желино и Сарај, каде што функционерите кои загубиле на изборите не се повлекле од своите позиции.
„Во ДУИ, очигледно, за пораз не се одговара, туку поразените се наградуваат“, велат од ВРЕДИ.
Од коалицијата оценуваат и дека повиците за нови избори повеќе не наидуваат на сериозна поддршка ниту во самата партиска централа на ДУИ во Мала Речица.
Реакцијата на ВРЕДИ доаѓа откако ДУИ претходно ја критикуваше владејачката коалиција поради тоа што повеќе од 24 часа не се произнела за изјавата на премиерот Христијан Мицкоски дека власта би одговорила позитивно доколку опозицијата побара предвремени парламентарни избори.
Од ДУИ тогаш оценија дека молкот на ВРЕДИ е знак на страв од ново соочување со граѓаните и од нивната изборна пресуда.
Со тоа, меѓусебните обвинувања меѓу двете политички опции продолжуваат, а темата за можни предвремени избори повторно станува дел од политичката дебата.
