ИСТАНБУЛ (АА) – Критикувајќи го неодамнешното затворање на конзулатите на некои западни земји во Истанбул, шефот на турската дипломатија, Мевлут Чавушоглу, таквиот потег го нарече „намерен“, додавајќи дека тие држави не споделиле никакви информации за она што го нарекоа „безбедносни причини“, јавува Анадолу.
„Ние мислиме дека ова е намерно“, рече Чавушоглу на прес-конференцијата во Истанбул со неговиот аргентински колега Сантијаго Кафиера.
„Тоа им го кажавме и на амбасадорите кои ги поканивме во Министерството“, рече Чавушоглу.
Изјавите на Чавушоглу уследија еден ден откако Туркије ги повика амбасадорите на западните држави, меѓу кои и на Соединетите Американски Држави (САД), за да упати критики за нивната одлука за привремено затворање на дипломатските претставништва и издавање безбедносни предупредувања по неодамнешното палење на исламската света книга Куран во некои европски земји.
Во Министерството за надворешни работи беа повикани и амбасадорите на Белгија, Франција, Германија, Италија, Холандија, Шведска, Швајцарија и Велика Британија.
„Зошто ги затворија конзулатите?“, праша Чавушоглу и продолжи:
„Велат дека постои терористичка закана. Па, ако постои терористичка закана, зарем не би требале, особено ако ни се сојузници, да кажат од каде доаѓа таа закана?“, рече тој.
„Ни велат: ‘Имаме конкретни информации, постои закана. Затоа ги затворивме.’ Од кого? Од каде доаѓа? Кој ќе го направи тоа? Нема информации за тоа“, рече Чавушоглу.
Турскиот министер повтори дека тие земји треба да ѝ дадат информации на Туркије за овие наводни закани.
„Тие мора да ги споделат тие информации со нас, односно со нашите безбедносни единици, со нашите разузнавачки тимови, ако постои таква закана, таа мора да биде елиминирана пред да се претвори во напад“, додаде тој.
Истакна дека тие држави сепак не ги споделуваат „конкретните“ информации и документи со Туркије.
Вчера, турскиот министер за внатрешни работи Сулејман Сојлу, исто така, го критикуваше затворањето на конзулатите, напоменувајќи дека тоа се случило токму во моментот кога Туркије објави ветувачки бројки за туризмот, велејќи дека необјаснетите затворања претставуваат „психолошка војна“.
Извор: www.aa.com.tr
