АНКАРА (АА) – Министерот за надворешни работи на Република Туркије, Мевлут Чавушоглу, денес изјави дека Атина и Анкара не би требало да чекаат нови земјотреси и катастрофи за да ги поправат односите меѓу Грција и Туркије, известува Анадолу.
Обраќајќи им се на новинарите заедно со грчкиот колега Никос Дендиjас во турската област Хатај, која е погодена од земјотресите, Чавушоглу ја поздрави поддршката што Грција ѝ ја даде на неговата земја по разорните земјотреси што во понеделникот ја потресоа Туркије.
„Фактот дека Никос Дендијас денес е тука со нас ја покажува солидарноста на грчкиот народ со Туркије и со турскиот народ. Добрососедските односи се видливи во овие предизвикувачки времиња“, рече шефот на турската дипломатија Мевлут Чавушоглу.
Потсетувајќи на земјотресот од 1999 година во Туркије, Чавушоглу рече дека и Грција доживеала потреси набргу по таа катастрофа.
„Тогаш Грција беше првата која потрча да ни помогне, а потоа Туркије потрча да ѝ помогне на Грција“, рече Чавушоглу.
Токму со тие зборови весникот „Тајм“ тогаш објави еден текст, а Чавушоглу како турски граѓанин испрати писмо до редакцијата на таа медиумска куќа и во него наведе дека многу е важна солидарноста во тешките врски, но дека не смее да се чекаат нови потреси за да се развиваат односите.
„Тоа го реков тогаш како обичен турски граѓанин. Денес, како министер за надворешни работи на Туркије, го делам истото мислење“, истакна Чавушоглу.
Тој повика на искрен дијалог меѓу Анкара и Атина со цел да се надмине разликата во мислењата.
Турскиот министер за надворешни работи исто така му изрази благодарност на Дендијас, на грчката Влада и целиот грчки народ за поддршката дадена во овие тешки времиња.
Шефот на грчката дипломатија Дендијас вети дека Грција ќе продолжи да ја дава потребната помош на својот сосед.
„Ние ќе продолжиме да даваме сѐ од себе за да ги пребродиме овие тешки времиња, како на билатерално, така и на ниво на Европската Унија“, рече Дендијас.
Тој рече дека се согласува со колегата Чавушоглу и дека Грција и Туркије не би требало да чекаат нови потреси за да ги подобрат своите односи.
Два разорни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
Бројни спасувачки екипи сè уште ревносно работат на пребарување и спасување на луѓето затрупани во урнатините на зградите.
Извор: www.aa.com.tr
