Белорусија му суди на добитникот на Нобелова награда за мир – се соочува со 12 години затвор

Бељачки беше уапсен на антивладини протести во 2021 година, а неговите поддржувачи велат дека авторитарниот режим на Лукашенко, со ова сака да го замолчи

Во Белорусија денеска започна судскиот процес против активистот за човекови права Алеш Бељачки кој 2022 година ја доби Нобеловата награда за мир заедно со други активисти од Русија и Украина.

Бељачки седна на обвинителка клупа со уште двајца активисти (Валентин Стефановиќ и Владимир Лабкович) од Центарот за човекови права „Весна“ кој тој го основаше, и се соочуваат со затворска казна до 12 години затвор.

Бељачки беше уапсен на антивладини протести во 2021 година, а неговите поддржувачи велат дека авторитарниот режим на претседателот Александар Лукашенко, со ова сака да го замолчи.

Режимот на Лукашенко го обвинува за шверц на пари во готовина со кои се финансирале активности на опозицијата односно антивладини протести.

Масовните протести на кои тој беше уапсен во 2021 година беа организирани поради обвинувања за нерегуларности на изборите една година претходно со кои Лукашенко се задржа на власт.

Лукашенко е претседател на Белорусија од 1994 година, а Бељачки го формираше центарот „Весна“ во 1996 година како одговор на тогашното брутално задушување на уличните демонстрации против Лукашенко.

При доделувањето на Нобеловата награда за мир од норвешкиот Нобелов комитет порачаа дека белоруските власти постојано се обидуваат да го замолчат Бељачки, но тој и покрај огромните тешкотии не отстапува ни педа во неговата борба за човекови права и демократија во Белорусија.