ПРИШТИНА (АА) – Советот на министри за внатрешни работи на 27-те земји на Европската Унија денеска во прво читање го усвои текстот на одлуката за безвизно патување за оние кои имаат пасоши издадени од Косово, јавува Анадолу.
Марија Малмер Стенергард, министерка за миграција на Шведска, која моментално претседава со ЕУ, рече дека Косово вложило големи напори за подобрување на управувањето со безбедноста и миграцијата и за усогласување на својата визна политика со политиката на ЕУ.
„Се надеваме дека нашата соработка во овие области ќе продолжи да биде плодна“, рече министерката Стенергард.
Во соопштението на Советот на Европската Унија се наведува дека новите правила ќе им овозможат на имателите на косовски пасоши да патуваат во ЕУ без виза во период од 90 дена во кој било период од 180 дена.
„Ослободувањето од условот за виза ќе се применува од датумот кога ќе почне да функционира Европскиот систем за патни информации и авторизација (ETIAS) или од 1 јануари 2024 година, што и да се случи прво“, се вели во соопштението во кое се додава дека новите правила сега треба да бидат усвоени од Европскиот парламент пред да бидат потпишани.
Косово е единствената земја во регионот на Западен Балкан која нема визна либерализација со земјите од ЕУ, кои се во Шенген-зоната.
Извор: www.aa.com.tr
