Новото издание на емисијата „360 степени“, во кое гостува директорката на Агенцијата за судии и јавни обвинители, Наташа Габер-Дамјановска, се емитува вечерва (3 март 2023 г.) од 22:20 часот на ТВ Алсат
Советот на јавни обвинители донесе одлука да распише оглас за прием на 31 јавен обвинител, сите во обвинителства надвор од Скопје. Меѓу 28-темина кандидати што ќе може да конкурираат за 31-то отворено место, најзвучното име за кое се крена врева во јавноста по објавувањето на конечната ранг-листа на оние што ја завршиле обуката на Академијата за судии и јавни обвинители, е Барлет Џафери, син на претседателот на Собранието, Талат Џафери. На огласот ќе може да се пријави, на пример, и Албулена Абази, сопруга на шефот на обвинителството за гонење организиран криминал и корупција, Ислам Абази, како и Јетмир Беџети, син на судијата во скопска апелација, Енвер Беџети, кој беше известител при одлуката да се укине првостепената пресуда во случајот за масовното прислушување „Таргет-Тврдина“, предмет за кој Судскиот совет заклучи дека неразумно долго бил држен во апелацискиот суд. Регрутирањето на идните судии и обвинители, квалитетот на обуката што ја добиваат и колку таа ги подготвува за сериозните задачи со кои се соочуваат при идната работа, е главната тема на која разговараме со директорката на Академијата за судии и јавни обвинители, Наташа Габер-Дамјановска.
Емисијата се емитува од 22:20 часот на ТВ Алсат.
ИЗВОР: 360stepeni.mk
