Србија не извезува воена опрема за Украина, тврди Дачиќ

„Србија, а јас можам да го тврдам тоа бидејќи моето министерство дава дозвола за извоз, не извезува воена опрема во ниту една земја за која веруваме дека би била проблематична и спорна на кој било начин“, изјави Дачиќ откако во неколку руски медиуми и на каналите на руската социјална мрежа Телеграм неделава се појавија непроверени тврдења дека Србија испорачала 3 500 ракети од системот „Град“ во Украина преку Турција и Словачка

Српскиот министер за надворешни работи Ивица Дачиќ денеска изјави дека од почетокот на војната во Украина од Србија не е извезено оружје за ниту една од страните во конфликтот. 

Изјавата на Дачиќ доаѓа откако во неколку руски медиуми и на каналите на руската социјална мрежа Телеграм се појавија непроверени тврдења дека Србија испорачала 3 500 ракети од системот „Град“ во Украина преку Турција и Словачка.  

Ракетите наводно биле од фабриката „Крушик“ во Ваљево. По објавите на руските медиуми вчера реагираше и портпаролката на руското министерство за надворешни работи Марија Захарова. 

„Србија, а јас можам да го тврдам тоа бидејќи моето министерство дава дозвола за извоз, не извезува воена опрема во ниту една земја за која веруваме дека би била проблематична и спорна на кој било начин“,

изјави Дачиќ за новинарите, пренесува регионалниот сервис на Радио Слободна Европа (РСЕ). 

Вчера, Москва преку изјава на портпаролката на руското МНР побара од Белград официјален став за информацијата дека српско оружје ѝ е доставено на Украина. Истиот ден, српскиот министер за одбрана Милош Вучевиќ уште еднаш ги негираше неофицијалните наводи дека Србија продавала оружје на завојуваните страни во Украина. 

На 27 февруари компанијата „Крушик“ од Ваљево објави дека на ниту еден начин не е поврзана со продажба на проектили на крајниот корисник од Украина. 

Инаку, рускиот портал „Маш“ неделава објави дека наводно пратките со ракети од 120 милиметри летале од Србија за Турција. Според порталот ракетите транзитирале преку Турција со посредство на турска компанија. Преку неа пратките отишле во Словачка, а потоа наводно во Украина. 

Министерот за одбрана на Србија, Милош Вучевиќ, на 27 февруари во Народното собрание изјави дека Србија не извезува оружје во Украина. 

 „Дали приватните компании купуваат на трети пазари и продаваат на компании во некои други земји, не е прашање за Србија“,

изјави Вучевиќ, одговарајќи на прашање на пратеник од опозицијата во српскиот парламент.  

Инаку, БМ-21 Град е советски повеќецевен ракетен систем од 122 милиметри кој датира од 1960-тите. Специјализираните портали за воени прашања наведуваат дека и денес се користи во воени конфликти, вклучително и во Украина.